الواد عوضين زود شلنين
فـ رغيف الفول والطعمية
قلت له ليه يابن اللئيمين
متكونش فاكرنا أفندية
دا الفول م الغيط والعيش م الجرن
ومنهم تعمل طعمية
قال لى يا با الحاج إصحى وفووق
شوف سعر اليورو بقى كام
فى سوق الصرف المصرية
قلت له يورو أيه ياروح أمك
وإيش جابه لسوق الطعمية
دا إحنا عايشين عيشه زبالة
ساكتين صابرين وأهي مرضيّة
قال لي يا با الحاج من الآخر
الفول تسعيرته دي دولية
هو الغلا جه لحدي وفرمل؟
ياللا متتنططش عليه
أنا قلت ف بالى بلاها فطار ولا طفح ف دي الصبحية
وبخفة ولطف وحنية،
قلت له عوضين.
قال لي عنييه
قلت له ربنا يخرب بيتك
إنت وجميع الحرامية
من أكبر راس فـ بلدنا
لجميع الدول العربية
خليتو عيشتنا مرار فـ مرار
ياعصابة الحكم العربية
وأنا برضه أستاهل على جبني
خلاكو تمرمطو فيَّه
واقرأ أيضاً:
عيال صايعه.. بس عندها منطق! / حدث في يوم شم النسيم../ يا عيني ع الدكاترة../ حتشبسوت.. قفلوا عليك يا حلوه تابوت/ بسم الله.. حلال الله أكبر....
تعليقات الأعضاء