قلتم مجرم وابن شوارع
نشال وحرامي ومخادع
وفي كل اشارة بيزعجنا
بكلامه وزنه المتتابع
جرايد يا بيه؟ فل يا هانم؟
وكأنه ولا أجدع بايع!!
كلة وحشيش وسجاير
وعقله بقي ضايع ضايع!!
قوليلي يا هانم .....قولي يا بيه
لما الشارع يبقي مكانك
وظاظا وهيما هما أصحابك
ولما يهري الجوع أمعاءك
ولما يهز البرد أجنابك
يبقي ساعتها نعمل ايه؟!
قوليلي يا هانم .....قوللي يا بيه.
لما نكون والخوف أصحاب
ومن الشرطة أكيد بنهاب
لما نلاقي الاجرام حل
يبقي أكيد هنكون أحباب!!
ولما أجسامنا تبقي مهينة
قتل وتحرش,,,,,ورضينا
لأ كمان وباعوا كلاوينا!!!!!!!
يبقي ساعتها نعمل ايه؟!
قوليلي يا هانم,,,,, قوللي يا بيه.
نفسي ف أكلة ونومة هنيه
ونفسي ف لعبة وعشرة وميه
وأعيش وسط عيلة تقيه
ونفسي أتعلم ويفخروا بيا
عارفة يا هانم ؟,,,,عارف يا بيه؟
صحيح أنا مجرم بس ضحية.
كلة: شيء مثل المخدر يشربه أطفال الشوارع
واقرأ أيضا:
أنت مجنون رغم أنفك / أب حي وابن يتيم / قانون بقاء العمل مشاركة / شبكة العنكبوت
تعليقات الأعضاء