آه يا قلبي، من غلبي، خده قلبك
تاه قلبي من نظرة، من أول يوم شفتك
خطفتني عيون تسرح
قتلتني رموش تدبح
وتهت من شوقي ف حسنك
**
جميل جماله رباني
بخد لونه ورداني
ورمش يتقال في أغاني
وأنا اللي كان قاسي زماني
زماني جه صالحني بحبك
**
فاتت سنين حب علينا
عاشقين وعاشقة ليالينا
خدنا الهوا سيبنا ادينا
قلبين غير الحب ما لينا
وانا قلبي له مين غير قلبك
**
سافرت أنا وقلبي معاكي
وشلت حبك جوايا
حلفت اجيب بكره معايا
واقول عشانك يا ملاكي
رجعت بالغالي مهرك
**
وجبت بكره وجيت بَعْدُه
سنين كتير لكن عَدُّه
وجاي أقول لك ضميني
ونسِّي قلبي سنين بُعْدُه
لقيتك انتي مش انتي
ولا الزمن صاين وعده
ونزلت أنادي على حبيبتي
وناس كتير طالعين عندك
أتاري دي زفِتِّك انتي
واتاري دي ليلة فرحك
**
وقاسي دايمًا يا زماني
وعلقمك كاسه سقاني
من صغري وانا قلبي يغني
ولا انت يوم سامع لحني
وكسرت عودي وكماني
وكل ده يجرى لي منك
وكل ده علشان خاطرك
يا ريته قلبي ما كان حبك
واقرأ أيضا:
سباعيات المجنون الفصيح بعد 30/ العشق الصعب/ خصام الحبايب/ الحب القاسي/ استشارة مجانية في الوسواس القهري/ عودة سباعيات المجنون الفصيح(4)/ زمن الغابة/ نغومة بنتي/ الغربة / إلى مدمن!!!
تعليقات الأعضاء