لو تسمح كرانيش ؟؟

بأستـأذنك..أكتب حياتك ع الورق

إني أكتبك من يوم ميلادك للنهارده مستحيل

هو إحنا نعرف مستحيل؟؟

هكتب حروف..تشبه عنيكي والكفوف الطيبة

وأرسم فانوس..بينور الليل اللي صاحبه

بدر ناقص منه حته

حته رسيت جـوّه منك

لجْل ماتنور ملامحك كلها من غير كسوف

حته دفيت من دفاكي

فاستحلت القلب اللي جايـز مش كـبير عن السّما

وإزاي يشيل همّك ده كله قلب يبقى مش كبير؟


قلب صاحبي..اللي أنا ساكناه أكيد

مش كده؟ يا بنت حبِّة حبّ

ويّا خاطر.. مستحيل نقولُّه لأ

هو إحنا نعرف مستحيل؟؟

شايفاكي وانت مدمّعه

قدّام مرايتك تسألي

ياربّنا! هو احنا ليه متمزَّعين بالشكل ده؟

هو احنا مش كافي لحياتنا الحب ده؟

هو إحنا...وانت بتسقطي قـدّام مرايتك م البكا

ولا تنجدك

ولا يعذرك غير دمعك اللي ملّ من شقِّ الخدود

ومن الحكاوي مع المخدَّه

.وانـت نايمه بتحلمي

زمان ... الحلم كان جنه

فِ بيت وعيال بتترمّى

فِ حضن الحب وأحضانك

ودلوقتي ... كابوس دايم بحزن بينهش الدّنيا من الدنيا وأحلامك

...قلمي بكا

قلمي بكا وأنا بكتبك

تفتكري كام.. دمـعه هتتساقط عشانك؟

أكيد رقم لـسه ما عرفوش البشر

اللي بتنطق كل يوم ألف كلمة مستحيل

.... هو احنا

هو إحنا نعرف مستحيل؟؟؟؟؟؟؟؟؟؟؟
شعر أسماء سليمان

واقرأ أيضا:
عيون ضيقة  / كيف ؟؟؟ / البدر سافر / ثم ماذا؟