افرحي يامه في عيدك
وانشدي أحلى نشيدك
وانسي كل جراح حبايبك
واوعي حتى تمدي إيدك
افرحي يامه في عيدك
**********
افرحي يامه وغني
وإن خاصمتك غصب عني
حته منك...... حته مني
في العراق بيموت وليدك
افرحي يامه في عيدك
**********
افرحي وانتي الزعيمة
زغرتى ف وش الجريمة
واعملي كام فيلم سيما
زودي بيهم رصيدك
وافرحي يامه في عيدك
**********
صرحي وقولي لعيالك
للعدا فاتحة قنالك
"دير ياسين" فين من خيالك؟
دمهم فين من وريدك؟؟
افرحي يامه في عيدك
تاني يوم احتلال العراق... كان موافق 21 مارس ومصر كلها كانت رسمياً بتحتفل بعيد الأم...... معرفتيش الكلام جه على بالي ازاي بالعامية المصرية... ملحوظة
كلمة (يا مًه) باللغة الفلاحي اللي أنا أنتمي ليها تعني يا أمي أو يا ماما زي ما تحبوا بس تتقري هنا (يا مًه) بتشديد الميم المفتوحة
تعليقات الأعضاء