(643)
لهم رب كريم يرعاهم
مراتي قالت؛ يا أبو العيال من عصابة الإخوان عليك بخاف، وأنا حياتي من بعدك طعمها مر. تسلمي لي يا غالية من كل سوء، ربنا ما يحرمنا من بعض. أنتي عارفة يا حبيبتي إني من صغر سني ما في مرة هربت. ودايماً بقول إن اللي ماتوا ف الميدان واللي لسه هيمتوا روحي مش أغلى منهم، ولا هم أجدع مني. شوفي يا هدية ربنا؛ أنا لو ما نزلتش النهاردة هشوف ف المرايا نفسي كل لحظة وأقول "أتفو". لو ما نزلتش النهاردة نهايتي إكتئاب وبجد بجد هموت. ومدام كده موت وكده موت خلينا بعزة وكرامة نموت. مراتي قالت إحساسك هو إحساسي، واللي بتقوله لنفسك بأقوله لنفسي من وراك ف السر. خلاص إنزل وأنا كتفي في كتفك نازلة، أما العيال حبة عيني؛ لهم رب كريم يرعاهم.
(645)
أستودعتكم الله ونفسي
شاب في ثورة خمسة وعشرين يناير كتب يلوم أبوه، ليه ما قلتش يا با من زمان للظلم "لأ"؟ ليه تركت عصابة تسرق مستقبل عيالك؟ بصراحة كلامه لسه بيرن جوايا. مش هقدر أحتمل حد من عيالي يلومني ليه سكت. علشان كده نازل أقول لولاد الكلب اللي عايزين يسرقوا مستقبل ولادي "لأ". لو جرى لي حاجه أوعوا يا أولاد حد فيكم يقول ليه يا بابا نزلت، أوعى يا أولاد حد فيكم يقول "طظ في مصر" كان نفسنا يا بابا تفضل معانا.
ما ينفعش يا أولادي نقول كده، عيب نسيب بلدنا يسرقوها تجار الدين اللي شايلين في جيوبهم أختام الجنة. لازم يا أولادي نقول "لأ" لاجل ما نحافظ على مصر بلدنا وعلى دين ربنا. أمانة عليكم يا أولاد ما تزعلوا في يوم مني، وافتكروني دايماً بالخير، أنا حاولت على أد ما أقدر أكون لكم أب كويس. آخرة كلامي يا حبايبي خلّوا بالكم من ماما واسمعوا الكلام ونخص بالذكر الآنسة منه، خللي بالك من إخواتك يا آية ولما محمد وأحمد يكبروا أحكي لهم أد إيهه بحبكم. مع السلامة، وأرجع لكم بإذن الله وإحنا منتصرين. استودعتكم ونفسي الله الذي لا تضيع ودائعه.
29/6/2013
ويتبع >>>>>>>>: حكاوي القهاوي (140)
تعليقات الأعضاء