|
| 
|
هكذا قال أبي: بزرميط حياتنا العربية م1
مش عارفة
أولا شكرا جداااااا ليكو كلكم وجزاكم الله خيرا كثيرا عن الوقت بتاعكم في الرد علينا.
واجب عليّ أني أعتذر جدا لدكتور محمد عبد الغني .
ولو ينفع تبعتو الاستشارة بتاعتي باسم بزرميط حياتنا العربية علشان يفتكر حالتي
وأنا أصلا رحت له المستشفى وشافني وهو اللي شخصني بالاكتئاب والقلق وعالجني بالإسيتا اللي بجد نتيجته كانت كويسة جدا على أرض الواقع بس الواحد كأول تجربة كان فيه تخوفات واستعجال لم أدركه غير بتغيير العلاج مع تطور حالتي للأسوأ بسبب زن والدتي بأني أترك الدواء بعد ما تحسنت وكدا .
المهم
التطور اللي عندي ومحاولة تذكير الدوك لما قلت له أني مش بعرف أقعد على الكرسي 5 دقائق على بعض علشان أذاكر كنت أظنه من القلق والتوتر وأني بنسى جداااا
بس لما رحت لدكتور (مدحت) قال لي بعد أسئلة كثيرة وتأكيد حالتي بـ ADHD لأنه سألني أنت بتقاطعي الناس في الكلام وبتفوتي أسئلة في الامتحان افتكرت وأنا صغيرة 12 سنة كانت مدرسة الرياضيات تكتب لي يا نسيان باستمرار علشان كنت أفوت سؤال وأجرى أصحح اعتقادا أني خلصت لكن كنت بنقص في الدرجات بسبب كدا
وبعد البحث وتكرار الأسئلة وأني أفتكر مواقف تدعم وتأكد أسئلته نوعا ما اطمأننت بأن درجة الغباء اللي وصلت لها غصب عني والسبب هو مرضي، والحمد لله على كل شيء.
سؤالي .
بخبرته هو أنا كدا المفروض أعمل إيه ؟ إيه نصيحتكم لي .
ولو سمحت مش تنشروا الاستشارة دي ولا اسم الدكاترة اللى رحت لهم لأني قلت لكذا شخص بكدا وهما متابعين الموقع ومش عايزاهم يعرفوا التفاصيل دي
أنا حكيت لهم بشكل عام وفي تفاصيل في الاستشارة سهل جدا يعرفوا أنا مين.
وهل المفروض كل مقابل حد أقوله أني أتعالج وكدا علشان يعذرني؟ أصل في حد بيشرح لي وأنا غبية أوي وفهمي بطيء للشرح. وبجد أنا تايهة أوي ومستمرة على البروزاك 20 والأتموكس 25 قرصين وابتديت جلسات مع الأخصائية مرة واحدة أسبوعيا وهل العلاج الفردي أفضل ولا الجماعي ؟
وبجد آسفة جدااا على إزعاجي لكم وربنا يقدركم على مجهوداتكم .
شكرااااااااااا د. وائل ولكل القائمين على الموقع
5/10/2017
رد المستشار
الاخت العزيزه تمنياتي لك بدوام الشفاء والتعافي
لا أجد غرابة في الجمع بين التشخيصين "الاكتئاب ومتلازمة فرط الحركة نقص الانتباه" وكذلك مع اطراب القلق العام، بشرط توفر السمات التشخيصية لأي منهم
أعتقد ان التركيز على متلازمة فرط الحركة ونقص الانتباه سواء بالعلاج الدوائي أو السلوكي هو الأولى والأهم في الوقت الحالي لأن الأعراض الاكتئابية وأعراض القلق غالبا ما تكون مترتبة عليه مع عدم إغفالهما طبعا
لا ضرر ولا حرج عليك في المتابعة مع الأستاذ الدكتور مدحت بسيوني فهو ولا شك أحد القامات العلمية في علاج الأمراض النفسية في الزقازيق ومصر بصفة عامة، وفي أي وقت تريدين استشارتي فسيكون ذلك محل ترحيب مني بكل تأكيد، وأنا متواجد يوم الثلاثاء أسبوعيا بعيادة الامراض النفسية بالدور الخامس من الساعة التاسعة صباحا
لن أستطيع أن أتحدث معك في أولوية أي علاجات دوائية عن غيرها قبل مناظرتك طبيا ومعرفة ما وصلت إليه حاليا
تمنياتي أن أكون وفقت في مساعدتكم، وأن يصلني كل خير عنكم في القريب العاجل
والسلام عليكم ورحمة الله وبركاته.
واقرأ أيضًا:
اضطراب نقص الانتباه وفرط الحركة ا.ن.ا.ف.ح في البالغين: مقدمة
نقص الانتباه وفرط الحركة ا.ن.ا.ف.ح في البالغين: الممارسة المهنية
نقص الانتباه وفرط الحركة ا.ن.ا.ف.ح في البالغين: المريض والتشخيص
اضطراب نقص الانتباه وفرط الحركة ا.ن.ا.ف.ح في البالغين: العلاج
تعليقات الأعضاء