بعد أن أصبحت شاذا .. هل من عودة !؟ م

بعد أن أصبحت شاذا .. هل من عودة !؟
السقوط في الجحيم
 
السلام عليكم ورحمة الله وبركاته، شكرا لكم ولاهتمامكم بالرد على كل الاستشارات التي ترسل للموقع لقد أرسلت استشارة قبل ذلك وأجاب عنها الدكتور (لم يذكر الاسم في الإيميل) وأرجو أن يجيب الدكتور وائل على استشارتي هذه
 
هل يا دكتور الميل لإقامة علاقة جنسية مثلية مع الذكور لا يعد مرضا نفسيا أو خللا على الأقل ويحتاج إلى علاج نفسي؟
 
ربما لم أوضح نشأتي ولا ظروفي في الاستشارة السابقة ولكن سأحاول إضافة بعض التفاصيل التي ربما تفيد حضرتك يا دكتور وائل في تشخيص حالتي، لقد نشأت في أسرة بسيطة أم متوفية وأب في العمل طوال اليوم وأخوتي كلهم بنات حتى أصحابي وزملائي بالمدرسة بنات لا أعلم إن كان هذا سبب ميلي لمثل جنسي أم لا، المهم كانت عندي تلك الرغبة منذ الصغر في الميل أكثر للأولاد رغم أني لم أقم بعلاقة جنسية حقيقة مع ولد في الطفولة كلها كانت محاولات فاشلة وألعاب جنسية مع بعض أولاد الجيران والكثير من اللعب الجنسي والمحاولات الجنسية مع البنات.
 
في المرحلة الإعدادية بدأت في عمل صداقات مع زملائي الأولاد بالمدرسة ولكني كنت عندما أتصاحب على شخص معين أرتبط به وأتعلق به لدرجة أني أحزن إن غاب عن المدرسة في يوم لدرجة أني أختنق وأود البكاء من الحزن وهكذا أظن حتى مرحلة الكلية كلما أصادق شخصا أتعلق به لدرجة أنا نفسي أتضايق منها ومن أني متعلق به كده.
 
بعد الجامعة وبعد أول سنة لي في الشغل بدأت أدخل على مواقع إباحية ومكنتش عمري عملت كده لعدم توافر نت قبل كده وبعدها بيومين تقريبا فكرت أبحث عن مواقع إباحية مثلية لأتأكد هل فيه رجال فعلا بتعمل علاقات جنسية كاملة مع بعض ولا لأ؟؟؟ وللأسف دخلت وشفت فيديوهات مثلية وعجبتني جدا للأسف وأدمنتها من ساعتها وأدمنت الاستمناء عليها بدل من المواقع الإباحية العادية.
 
وطبعا خلال الفترة دي كلها من أول الإدمان لغاية جوازي كنت أحاول أن أقلع عن هذه الفيديوهات المثلية والاستمناء لكن كنت دائما أفشل وأرجع لهم ثانية، المهم اعتبرت الجواز نهاية للي أنا فيه وإن كل اللي أنا محتاجة هو إقامة علاقة جنسية وخلاص وإن هذا سيتحقق بالجواز، وفعلا تزوجت وعاهدت ربنا أني ما أرجعش تاني للإباحية ولا الاستمناء إلا أني بعد أسبوع واحد من جوازي بدأت تظهر مشاكل كثيرة في العلاقة كانت بتخليني ما أحسش بالمتعة التي كانت في دماغي والتي كنت أتمناها.
 
من أمثلتها أن زوجتي ملتزمة جدا وماتعرفش حاجة عن الجنس ورافضة تجرب أي حاجة جديدة أو وضع حتى لما كنت بتكلم معها بالراحة وأحاول إقناعها كانت تحاول محاولات بسيطة وفي الآخر تقول لي لا مش عارفة أعمل كده ونستسلم للأمر الواقع ونرجع تاني للعلاقة الجنسية الروتينية بين أي اثنين متجوزين كأنهم متجوزين من عشرين سنة رغم أني بحس أنها بتستمتع جدا بالعلاقة لكن تيجي عند الإيلاج وأحسها بتتعب وتكون عايزة ننتهي بأسرع ما يمكن
 
والنتيجة طبعا رجعت ثاني للإباحية المثلية والاستمناء عليها بعد أول سنة من جوازنا وزاد تعلقي بالفيديوهات اللي بشوفها وكنت أتمنى إني أعمل علاقة مثلية، وللأسف من 4 شهور بس دخلت لموقع دردشة للمثليين وتعرفت على ناس زيي وبدأت أقابلهم وأعمل معهم علاقات جنسية في البداية ماكنتش علاقات كاملة لكن بعد كام مرة للأسف بقيت بعمل علاقة كاملة مع اللي أقابله ومن ساعة ما بقيت بعمل علاقات مثلية بطلت الفيديوهات والاستمناء خالص وما بقتش بفكر أصلا أتفرج عليهم
 
في البداية كان الموضوع ثقيل أوي على نفسي ومش متخيل إزاي أنا أعمل حاجة زي دي (رغم إن أصحابي في الجامعة كانوا أحيانا يصفونني بالتشدد مش بالالتزام) إزاي أوصل للدرجة دي؟ وبعد كل ممارسة مثلية كنت ساعات كتير بسرح وأنا واقف في الشباك وأفكر جديا إني أرمي نفسي وأخلص من القذارة التي وصلت لها واستسلمت لها للدرجة دي.
 
مرة في مرة بقى الموضوع عادي وما بقتش أحس بنفس تأنيب الضمير لكن كنت دائما أهرب من مواجهة نفسي أو التفكير في اللي أنا بعمله عشان ماحسش بالذنب زي زمان وبقيت بكره نفسي وبكره إن أي حد يمدحني سواء صحابي أو إخواتي أو أي حد، ببقى نفسي أصرخ في وشه وأقول له أنا شاااااذ أنا مش محترم أنا أسوأ بكثير مما تتخيل ومش عارف ليه إحساسي بالخنقة من معاملة الناس الكويسة لي ومش عارف ليه نفسي أقول للناس على اللي أنا بقيت فيه بس طبعا مش قادر أتكلم ولا أقول لحد رغم أن زوجتي طبعا ملاحظة تغيير علي لأني معظم الوقت سرحان وبقالنا أكثر من 4 شهور معملناش علاقة أنا وهي لأني كمان خايف عليها أحسن أكون اتعديت أو اتنقل لي أي مرض من اللي عملت معهم وخايف أعديها
 
دلوقت أنا بحاول أبطل وأبعد عن الموضوع دا لكن الموضوع طلع صعب بجد والله مش زي ما حضرتك ولا أي حد يتخيل، أنا أخيرا لقيت الحاجة اللي بكون مستمتع وأنا بعملها ولقيت ناس زيي بيفهوني وبفهمهم وبنحس ببعض ونفضفض مع بعض مش مجرد علاقة جنسية وخلاص، لكن في الأول والآخر دي حاجة حرام وربما تكون من الكبائر مش عارف أعمل إيه؟؟؟ ولا أطلع من الحفرة التي أنا رميت نفسي فيها دي إزاي؟؟؟ نفسي أبطل وأرجع تاني إنسان عادي أرجع تاني أعيش لبيتي وأولادي وأعمل علاقة عادية مع زوجتي حتى لو مكنتش هستمتع بيها لكن على الأقل حلال.
 
والله يا دكتور وائل أنا عارف أني غلطان وغلطي كبير ومش ناقص حد يقول لي كلام يحبطني أو يخليني أيأس من نفسي، أنا عايز حد يساعدني ويمد لي يده يدلني بس على بداية الطريق الذي أمشي فيه ويقول لي خطوات عملية عشان أنقذ نفسي وحياتي من السواد اللي أنا فيه دا وأفوق لنفسي وشغلي وبيتي قبل فوات الأوان
 
أرجوك ساعدني بالله عليك
اعتبرني أخ صغير لحضرتك وغلطت وأطلب منك المساعدة
 11/1/2022