|
| 
|
مشكلة ما تمت! قلت انتحار فطار!! م6
لا شيء يوصف
أنا تعبت من الزعيق والتأنيب محدش حاسس أو فاهم أنا بحس بإيه أو بمر بإيه شايفين بجد أخطائي بس الامتحانات على الأبواب وأنا مش مليش نفس للمذاكرة أنا مش طايقة أقعد ثانية واحدة على الأرض. هو أنا فاشلة؟ طب بلاش دي هل أنا وحشة؟ أنا ليه محدش فاهمني طيب هو أنا معاهم إني عصبية وكئيبة وأوڤر ومتطقش بس أنا روح يعني!!
ووالله بحس أن مفيش فيّ طاقة ولا روح ولا حتى خلق إني أفتح عيني وأواجه يومي مش أقوم وأتعامل وأضحك وأبين إني مبسوطة وأذاكر وأجتهد، أنا تعبت بجد من اللوم والزعيق جملة اتقالت لي كذا مرة من أهلي أن (اللي يكرر الغلط كذا مرة يستحق الموت) طب ما أنا بحاول أموت نفسي ومش عارفة كل مرة أحاول مش بعرف بأذي نفسي بس لا وحضرتك تقولي قوللهم أني محتاجة أروح لدكتور ههه طيب أوي حضرتك كأني بقولهم سبب جديد أتعاير به
أنا لسه بتعاير على إني ضيعت حوار المدرسة من إيدي اللي بردو ضاعت بسبب المذاكرة اللي مكنتش بذاكرها عشان حضرتي بتمايع ومكتئبة عايزين دائما النتيجة ومش مهم الباقي مفكريني مش مهتمة أو مطنشة ونسيت بس أنا بلوم نفسي بدل المرة ألف لما بعمل الغلط أو أضيع حل من إيدي عندهم حق أنا فعلا فاشلة وماستحقش إني أعيش، جايز بس أنا تعبت بحاول ألاقي حل أموت نفسي بيه من غير حتى ما يعرفوا أو يحسوا عشان ميقولوش أهلها ناس محترمة وأمها بتربي أجيال وبتساعدنا نتعامل معاهم إزاي وهم معرفوش يتعاملوا مع بنتهم عندهم حق
أنا حتى لسه الأسبوع اللي فات أقنعت حد من صحابي يروح لدكتور بالرغم من أن أهله ميعرفوش بيعاني من إيه وأنا يعتبر من القليلين اللي أعرف بس سابوه يروح وراح بس أنا معرفش أعمل كدة للمرة الأخيرة، أنا حقيقي أستحق الموت أصل إيه هدفي نسيته أو تناسيته عشان عارفة إني فاشلة مش هحقق حاجة فبلاها أحسن
لو حضرتك عندك حل ثاني غير حل إني أروح لدكتور وأعرفهم يبقى من الأفضل حضرتك تقول لي أن أسهل طرق النجاة إني أنتحر وخلاص
ما هو مفيش حل بقي
28/12/2022
رد المستشار
الابنة الفاضلة "سلمى" أهلا وسهلا بك على مجانين وشكرا على ثقتك، واستعمالك ومتابعتك خدمة الاستشارات بالموقع.
هل المشكلة هي أنك لابد أن تطلبي إذنهم؟ أم المشكلة هي ما تتوقعين من أتعاب للطبيب النفساني؟ إن كانت الأولى فلابد أن تحاولي.. فإن لم تجرئي تحسبا لعواقب تحسنين تقديرها، فيمكنك طلب العون من طبيب نفساني دون معرفتهم، وأما إن كانت الثانية فقد قلت لك أينما تستطيعين الوصول إليّ أهلا بك وقولي لهم كلمة السر التي لن أكررها!
لا يوجد حل سوى طلب العون من مختص، لأن الاكتئاب المصحوب بما يشي بسمات شخصية مضطربة، وتاريخ لإيذاء الذات لا يمكن أن يترك دون علاج.
ومرة أخرى أهلا وسهلا بك دائما على موقع مجانين فتابعينا بالتطورات.
ويتبع>>>>: مشكلة ما تمت! قلت انتحار فطار!! م8
تعليقات الأعضاء