هل أنا مريضة نفسية ولا لأ؟ جائز!

 السلام عليكم
 
 أنا مشكلتي كلها بسبب العلاقات، عندي تعلق شديد بالناس وللأسف مفيش حد تعلقت بيه إلا وسابني، وعندي مرض التعلق ده من وأنا صغيرة بسبب أنا علاقتي بأهلي كانت وحشة جدا، بابا كان بيضربني جامد بعصاية أو بحزام أو بإيده، في مرة ضربني على وشي وشفايفي ورمت وجابت دم، وفي مرة قطع حزام جلد علي أنا وأختي، وفي مرة ضربنا بإيد مكنسة لحد ما جسمي أزرق من الضرب وحسيت إن روحي بتطلع، ماما كمان كانت معاملتها وحشه جدا معايا على طول تقولي أني عرة البنات وأني مش حلوة وأن البنات أحسن وأشطر مني في شغل البيت مع العلم أنا متفوقة دراسيا ودايما بطلع من الأوائل، دايما كانت تضربني جامد وتخليني أقف وشي في الحيطة وأرفع إيدي
 
 كان عندي مرض وأنا صغيرة وهو السرقة كنت أي فلوس بلاقيها باخدها أخبيها على الرغم أني كنت باخد مصروف، ومرة واحدة قريبتي زعقلتي وهانتني فأخدت مفتاح شقتها وخبيته انتقاما منها، وكنت بعمل تصرفات غريبة وأنا صغيرة زي بضرب بطني بقيضة إيدي انتهيت من التصرف ده بقيت بنفخ في إيدي ثم أبربش بعيني، ثم أهز دماغي كل شوية يمين وشمال كل سلوك من دول يقعد فترة كبيرة وبعدين أعمل سلوك تاني، أنا لما بخاف جسمي بيتلج وبترعش وضربات قلبي بتزيد جامد وبفضل أعيط ببقى محتاجة حد يطمني ويفضل معايا لحد ما أهدى، في مرة وأنا في 6 ابتدائي تعرضت لحادثة وأغمى علي وبعد ما فوقت رحت درسي وأنا متعورة وهدومي اتقطعت ومرضتش حد يبلغ أمي عشان خوفت ألا تخاف علي ومتشوفش قدامها، تحملت الوجع ولما خلصت الدرس رحت وقلت لها اللي حصل قالت لي أنتي جاية بعد ساعتين تمثلي علي ومش صدقتني غير لما وريتها الجرح اللي في رجلي، والأمر ده مأثر فيا
 
 وأنا صغيرة جدي توفي كان أقرب حد لي وكنت بحبه جدا مكنتش فاهمة يعني إيه مات ففي واحدة قريبتي قعدت تصرخ في وشي وتقولي جدك مات يا نورهان وقعدت تصرخ جامد لحد ما أنا خوفت وقعدت أعيط الكلام ده كنت حوالي ٤ أو ٥ سنين، أنا لحد دلوقتي عندي مشكلة مع الموت بخاف منه جدا وبخاف أفقد أهلي خاصة بابا مجرد تخيل إن ممكن يحصل له حاجة حالتي بتسوء بعيط جامد ومبقدرش أسيطر على نفسي، أنا دخلت علاقات كتير ارتبطت كتير يعني بس كلهم كانوا من طرف واحد أنا بس اللي حبيت يعني، في التلات سنين دول عرفت شخص آذاني أبشع الأذية ودايما يبعد ويقرب، هو شخصية نرجسية، وكان بيكلمني لغرض شهواني منه وللأسف حصل بينا علاقة إلكترونية والأمر تطور وبقى فيه تجاوزات وملامسات منه في الواقع لكن بدون علاقة، هو اللي عرفني على الجنس أنا وقت ما عرفته كنت 15 سنة، وأنا لحد دلوقتي بمارس العادة السرية ومدمنة الإباحية بحاول كتير أبعد وفي الآخر بقع وبعملها غصب عني.
 
 أنا كل اللي ارتبطت بيهم اتعلقت بيهم تعلق جنوني ولما بعدوا عني تعبت، ودايما عندي تصور أني هموت لو اللي بحبه بعد عني، أنا للأسف وأنا في تالتة ثانوي كان عندي صاحبتي قريبة مني وبعدت عشان تركز في دراستها، وقعدت حبة مبكلمش حد، بعدين اتعرفت على بنت معايا في الفصل وبقينا صحاب وبنروح ونيجي مع بعض، وكانت مصاحبة واحدة بس كانت صاحبتي بردو س بطلنا نتكلم  س دي قالتلها أنتي بتكلمي نورهان ليه أنتي مش عارفه أني مبحبهاش وصاحبتي جات قالتلي ده س قالت عليكي كده، المهم جات في مرة صاحبتي دي قفلت فونها وبقيت أرن عليها متردش علي خالص وأكلمها واتساب بردو متردش علي ورنيت على مامتها بردو ماردتش قعدت أسبوع كده وبعدت عني من غير ما تقولي أي سبب، وجيت رحت الدرس لقيتها رجعت تكلم س تاني وبقوا صحاب مع بعض، ومن وقتها وأنا بقيت انطوائية جدا وبطلت أصاحب لحد النهاردة، خاصة إن علاقتي بصحابي مكنتش أحسن حاجة لأن معظمهم كانوا بيغيروا مني بسبب أني شاطرة.
 
 أنا عايزة حل لمشاكلي وإزاي أبدأ أحسن شخصيتي وأتخلص من التعلق، وهل أنا مريضة نفسيا ولو آه إيه خطوات العلاج؟ أنا بفكر أروح لدكتور نفساني في عيادة الجامعة فإيه رأي حضراتكم في الأمر ده؟
 آخر حاجة أوقات بيجيلي أفكار أني أنتحر، في مرة كنت واقفة عند القطر وعقلي كان بيقولي ارمي نفسك بس خوفت ألا مموتش وأفضل عايشة معاقة وأكون عالة على أهلي + أخيرا أنا علاقتي بأهلي نوعا ما اتحسنت عن صغري ولكني بتجنبهم بفضل القعدة في أوضتي لوحدي طول اليوم، علاقتي بأختي الصغيرة وحشة جدا مبحبش أكلمها دايما بصوت في وشها على طول عصبية، هي مقربة من أختي الوسطانية عني، معلومة كان هيكون عندي أخ وبعد ما اتولد بأسبوع مات بسبب أنه نزل مشوه وده سبب لي تعب جدا خاصة أني كان نفسي في أخ ولد ولحد النهار بفتكره وبعيط
 
 آسفة على الإطالة ولكن أنا في أشد الاحتياج للعلاج، وياريت لو مشكلتي متنزلش على الموقع ولو ينفع تردوا علي على الإيميل أفضل ويكون في سرية
 وأكون شاكرة جدا ليكم
 11/5/2024