اسم مجانين اسم الله عليه

أرسل أحمد الشاعر (28سنة، مهندس، مصر) يقول:
 
 مجانين العقلاء!!!!!، سأذكر لك قصة؛
 في بلد بعيده من أزمان بعيدة حاكم (زي حكامنا كده جزاهم الله عنا شر الجزاء) كبر سنه ونفسه يخلف ولد، وبعد عمر طويل _في الحكم طبعا_ جاء له الولد بس كان للأسف بأذن واحدة، وطبعا ماينفعش الرئيس الجديد _المنتخب طبعا_ يكون معيوب _مع إن غيره من غير عقل وبقى ملك_ فقام مطلع قرار جمهوري بأن كل أولاد الك.. _قصدي البلد_ يتقطع منهم ودن أسوة بابن الرئيس، وطبعا الشعب هلل للتعديلات الدستورية الجديدة، وتم تنفيذ الحكم، وكعادة حكاياتنا لازم فيه "إن"، فكان فيه بيت في آخر القرية خبأوا الولد ابنهم علشان أبوه كان معارضه بعيد عنك، المهم فاتت السنين وطبعا ابن الريس بقى ريس ورجع الولد المستخبي وبان، وبقى كل ما يمشي في البلد يشاوروا عليه ويقولوا: أبو ودنين اهه.. أبو ودنين اهه.
 
 سيدي، لم أكن أتوقع أن أبو ودنين يقطع ودانه علشان يريح الناس اللي مش عاجبهم شكله، صراحة صدمت لما شفت اسم الموقع الجديد، بصراحة حاجة مايعة وحاسس إني في مصحة نفسية، وهو أقرب لعنوان كتاب على رف مكتبة يعلوه التراب منه لموقع أغلب زائريه شباب.
 
 سيدي، اللي بيحاول يرضي الكل _زي مبارك كده_ بيوقع كل حاجة_برده زي مبارك كده_ وأجمل ما في الاختيار هو القرار ذاته، وإخضاعه للاستفتاء هو من سبيل التهرب من عواقبه، وان كنت مع التغيير بشكل عام _وخصوصا الرئاسي_ لكن التغيير النابع من اختيار مش لأن الناس عاوزه كده، مش هاتكلم في جمال الاسم دعائيا ومعنويا وإعلاميا، لكن اللي ممكن يتقال في كلمة بيبوظ لو اتقال في اتنين.
 
 شيلوا العقلاء، لأن أجمل ما في المجانين أنهم يتكلمون بالعقل
 
 أحمد الشاعر
 29/12/2007
 
 آه آآآآآآآآآآآآآآآه ..... بصراحة يا أحمد أنا كنت متأكد أن المجانين سيقفون معي ويرفضون تغيير الاسم ولكنني في نفس الوقت تعرضت لضغوط شديدة من زملاء وأساتذة وناشطين حقيقيين مخلصين على مجانين.... ولهذا أضفت عقلاء هذه.... وأنا أعرف أن هذا لأجل ما يعلمه الله.
 
 جميلة جدا القصة التي أهديتها لنا يا أحمد بارك الله فيك، وها أنت تنضم إلى صفي أنا فيما يتعلق بتسمية مجانين فشكرا لك من القلب.
 
واقرأ أيضاً:
عنوان الموقع.... / تغيير اسم الموقع.. / لماذا سميناه مجانين؟ / مجانين = مبدعين : نقاش الأسماء والمسميات