عزيزتي حواء اشتري صحتك..

من المسلمات أن الحياة لا تسير وردية يوجد عدد من المنغصات والتي يمكننا تفاديها أو تكبيرها وخسارة كل شيء.. هناك بعض التعامل الخاطئ.. أو التعبير عن الحب والاهتمام أو الاحتياج لكننا نقوم بيه بطريقة خاطئة بالتالي النتائج سيئة..
 
 عدم العبث أو التفتيش وارء شريك الحياة من خلال الموبايل أو وسائل التواصل الاجتماعي لأن النتيجة ستكون حتما صادمة لك.. ومن الممكن بل أكيد ستلفتين انتباهه إلى الخيانة (ما أنا كده كده خاين) وعشان حضرتك خايفة يخونك فهيخونك عشان تبطلي تخافي.. ودي طريقة الرجل (العلاج بالتعرض ومنع الاستجابة).
 لا تتعاملي معه على أنه(ملكية خاصة لك وحدك) حب الامتلاك من أخطر الأشياء التى ستجعلك تخسرينه وبجدارة، أمك لأ أصحابك لأ أختك نونونو إنت وهبت نفسك للعمل وليا.
 
 بلاش إنت متشيك يعنى رايح فين؟ آجى معاك؟ وبيرفيوم ليه؟ وراك حاجة؟ ومحمود مين؟ أول مرة أسمع عنه!! ومبسوط ليه ووشك منور ليه دا صحابك!!؟ .. آه عادي إنه بعد إهمال في نفسه فترة نتيجة العمل يرجع يهتم تاني بنفسه مش عشان زنك كست مصرية أصيلة هيخليه يرجع يفكر في استغلال الوسامة والشياكة والأناقة دي مش هتروح على الفاضي هتروح فين ..
 
 لا ترهقيه بأعباء ومشاكل الأولاد والمنزل ألوووووو الواد وقع، ابنك مش نافع، الووووو بنتك بتعيط، إلحق إلحق إلحق..
 ولما يتصل عليك حاولي تفصلي وتغيري نبرة صوتك اللي راح من الجري والصويت ورا العيال واسمعي منه أكتر ما تكلمي وتشتكي وخلي الشكوى دي لما يسأل الأولاد فين.
 
 بلاش هسيبك لك البيت هسيبك البيت هسيبك لك البيت كتر تكرار الوعيد والتهديد هيخليه يبقى قرفان وزهقان من الأسطوانة ومستني التنفيذ وترك المنزل دي أحلى مرحلة في حياته سوف يدلل من الجميع أمه وأخته وأصدقاءه .. وهيبعت لك .. نشكر حسن تعاونكم معنا.
 
 بلاش لما تزعلي معاه تحسسيه إنه  ATM بتاعنا عايزين وعايزين وعايزين طب وعايزين، احرصي على تناول الوجبات معه حتى في (حالة الخصام)، يوجد قواعد لا يجب كسرها وتذكري قوله تعالى وجعلنا بينكم مودة ورحمة.
 لاتطيلي في الخصام، لا تعطيه ظهرك أثناء النوم (في حالة الخصام)، فكل منا ليه حقوق وعليه التزامات مهما كان الوضع، لاتقارنيه بأحد حتى ولو كان أبوكي أو أخوكي أو ممثل سينمائي فالوالد والأخ والزوج كل منهم له احترامه ومكانته ودوره فلا يجوز تبديل الأدوار أو التقليل منها.
 
 بلاش بوستات التلقيح على الفيس ووسائل التواصل الاجتماعي في حالة الخصام وبلاش تغير اسم البروفايل من قرة عيني إلى أميرة بحجابي وتغير الصورة وحذف صورته ووضع صورة الأستاذ أمير كراره.
 
 الحاجات اللي بتضايقوا بجد واتفقتوا عليها وبطلناها بلاش نرجع ليها تاني بجد بلاش بلاش بلاش لو روحك هتطلع، الصوت الواطي الصوت الواطي الصوت الواطي حتى في الخناق (اتخانقي بشويش على الضيق في محيط العمارتين اللي حواليكي معلش تعالي على نفسك وخليها خناقة على الضيق)
 
 وهو نايم بلاش يا كريمة على رأي الأستاذ محمود عبد العزيز ساعة الظهرية وتيجي إنتي والعيال تتخانقوا وتصوتوا فوق راسه..
 عدم استغلال الأولاد كوسيلة ضغط أو تصفيه حسابات..
 لازم تفتكري ديماً أنه زوجك مش ابنك ولازم نطبق عليه (أساليب التربية الايجابية بحزافيرها).
 بلاش نمشي وراء جروبات وسائل التواصل الاجتماعي اللي بتخرب البيوت، ماشين بمبدأ الست الفاضلة ماري منيب طوبة على طوبة خلي العركة منصوبة..
 
 مش تخنقيه حب ورمانسية 24/7 بمزاجهم بيحبوا يسمعوا وبيحبوا يقولوا بلاش ماعنتش بتحبني ماعنتش بتحبني إنت اتغيرت إنت انتغيرت بس إنت اتغيرت..
 
 لو قاعد ساكت بلاش كل شوية مالك؟ مالك؟ مالك؟ إنت كويس؟ إنت كويس؟.. في أمور مكدرة حياته بس مش ينفع يتكلم فيها من باب الخصوصية .. ومن باب الخوف عليكي من القلق (له مساحة خصوصية)
 الست الفاضلة أمه وأخته خط أحمر طلعي روحهم بعيد عنه هو كائن محايد مسالم لاهيجي عليهم ولاهيجي عليك .. هو كتكوت ضعيف الجناح والدنيا حطت عليه..
 
 يشكر في أكل أمه عادي، أكل مرات البواب، أكل مرات بنت عم خالتو، إنتي عادي جدا.. لأنك أولا إنسانة واثقة من نفسك ولاينقص منك الموضوع شيء لأنها أذواق في الأول والآخر وممكن يكون مجرد مجاملة.. ما هو برضو بيشكر في أكل المطعم الفلاني وبينتقض المطعم الآخر فبلاش تاخدي الموضوع حرب .. ولازم تعرفي إن الرجل كائن لطيف مجامل مع خلق الله إلا مراته طبعًا..
 
 كبري دماغك هتلاقيه كائن لطيف ظريف مسالم متعايش مع الواقع غير كده استحملي بقى.

واقرأ أيضًا:
الشحاذة باليوتيوب والثراء بين ليلة وضحاها / تجد راحتها بتعدد الرجال