27 سنة متزوجة منذ 13 عام

 مساء الخير
 
أنا بصراحة جاية أفضفض وعارفة الفضفضة مفيدة، ويمكن مواساتكم لي تحسن من حالي، أب مات بس كان مهمل لي طول الوقت، أخ كبير سافر بره ومش فارق معه أخته عايشة إزاي ولا حالتها الصحية إيه، أم قاسية بتزعل مني على أقل كلمة وتخاصمني بالأسابيع وفي الوقت ده بترجعلي كل حاجة اشتريتها لها زمان، فلوسي مش ببخل بيها على أحد من أهل بيتي يمكن عشان كدا ربنا رزقني من كرمه ومخليني ساترة نفسي بكامل احتياجاتي.
 
رغم تصرفات أهلي أنا مدخلتش في علاقات عابرة ولا تسلية، ومفيش راجل قدر يدخلني لسكة التسلية واللعب، أنا شخصية قوية لأني مع كل الاضطرابات النفسية دي مفكرتش في إني أنتحر، ومتشخصة بمرض في المخ وبنزل الدكاترة لوحدي بتابع حالتي الصحية بكامل طاقتي بذاكر لها عشان يبقى عندي وعي وأحافظ على استقرارها لأن مهددة بفقدان البصر لو حالتي مستقرتش
 
مش هعيش عمري اللي فاضل في الظلمة، بنزل أعمل الأشعة بفلوسي اللي تعبت في شغلي عشان يبقى في جيبي فلوس، جبت مؤخرا سلسلة ذهب كان حلمي من زمان ألبس سلسلة ذهب مش مجرد إكسسوار وكنت في كامل فرحتي أنها من مرتبي وهي حوالين رقبتي مع إن نفسي حد يجيب لي هدية أفضل لابساها علطول
أنا رغم كل ده أنا قوية رغم أدوية الاكتئاب اللي بتصبرني أوقات بقول الدنيا مش مرحبة بيا سيباني بطولي بس دماغي متشال منها نهائيا فكرة الانتحار.
 
متقلقوش مش هتوديني الوحدة وقسوة أهلي ولا إني لسا متجوزتش لكذا أنا مش هسيب الدنيا بمعصية
ادعوا لي عشان كلامي ملخبط لأن نفسيتي سيئة جدا دلوقتي
10/3/2025