عارفين القصة الشهيرة: لا قصتنا غير!!

مساء الخير موقع مجانين

عارفين القصة الشهيرة الرجل الذي عندما يخون زوجته مع واحدة بيفهمها إن هو وزوجته شبه منفصلين وإنه بينام على الكنبة وعايش معها بس عشان الأولاد؟ ودائما بيبقى كذاب وهو وزوجته عايشين زي الفل؟ أنا بقى بابا كسر القاعدة ذي وفعلا بقاله أكثر من ١٥ سنة عامل كده في ماما عشان هو مع واحدة تانية التي أعتقد تزوجها ما هو مش معقولة كل السنين دي قاعدين من غير جواز.

أنا عايشة وكاتمة جوايا السر ده من وأنا في ثانوي عشان مخربش البيت وعشان عمري ما أقدر أواجه بابا إني عارفة وعشان ماما لو عرفت وتأكدت ممكن تروح فيها، بس فعلا الحياة ما بينهما بشعة مفيش حياة أصلا وماما تعبت أوي من كثرة التهميش ومن كثر ما هي كأنها هواء مش موجودة ومش مرغوب فيها من ناحية بابا

أنا فعلا مش عارفة أعمل إيه أنا تعبت أوي وهي وصلت لمرحلة إنها عايزة تمشي من البيت وأنا من جوايا مش قادرة أهدئها لأنها عندها حق وعمري ما أقبل على نفسي عيشتها ذي لو أنا مكانها وفي نفس الوقت أنا عشان متأكدة وعارفة إن هو مع الست الثانية فعارفة إن مفيش أمل

ويا ليتها نزوة لا ذي سنين وأنا متأكدة بنسبة ٩٥٪ إنه كمان متجوزها، تكلمت معه أنا وأخواتي قبل كده في علاقته بماما بس برضو مفيش حاجة تغيرت!! هو أب تحفة وبيعمل كل حاجة عشانا وهو أكثر حد أحبه في حياتي بس للأسف زوج ظالم

ماما متقدرش تعيش لوحدها ولا ماديا ولا نفسيا فأكيد أنا كمان هسيب البيت معها وبجد حياتنا المملة الباردة التي كنا نحاول أن نرضى بها ستنهار
ماذا أفعل أنا؟
30/1/2025