سبع سنين ونصف مشاكل وصعوبات !

 السلام عليكم.
 
محتاجة نصيحة للتعامل مع بنتي، عمرها ٧ سنين ونصف، مستوى دراسي سيء جداً، درجاتها أحياناً صفر، بديهيات زي الجمع والطرح مش عارفاها يعني لحد دلوقتي بتعد على صوابعا علشان تقولي ٢ +١= كام، مشاكل سلوكية كتير جداً، يعني بتمثّل للأطفال اللى حواليها طفلة غلسة ومصدر إزعاج للمدرسات، في أولى ابتدائي مدير مدرستها بلغني إنه مش عايزها ومنجحتش في اختبار حضانتين قبل المدرسة ولا في اختبار مدرستين السنة الي فاتت.
 
سافرنا السعودية لباباها ودخلت مجموعتين دراستيين، أول مجموعة كانت شكاوي كتير جداً وسبناها بعد فترة لتغيير المدينة، والمجموعة الجديدة طلعتها منها لأني لقيت كمية مشاكل مش طبيعية، ولقيت زمايلها واخدين منها موقف جماعي ورافضين يقعدوا جنبها أو يلعبوا معاها وقالولي لفظاً "إحنا بنكرهها" فخرجتها منها علشان نفسيتها.
 
من الشكاوي برضو تكسير حاجات زمايلها وتقطيع كتبهم ورميها من الشباك، خروجها وتطويلها بّرا الفصل، عدم تركيزها وتايهة لوحدها، هي مش بتعرف تتصرف أوي يعني نوعاً ما لازم أوجهها في كل حاجة، بتتكلم كتير جداً وبتعيد نفس التفاصيل ونفس الاسئلة، مش بتعرف تسرد أحداث يومها، بس بدأت شوية تحكي أحداث، بتكدب كتير جداً، أحياناً بحس إنها مش فاهمة إنها بتكدب زي إنها تقول إنها كانت كويسة في الدرس وأكلم المس تقولي مكانتش مركزة خالص.
 
التعامل معها صعب، يعني بحاول أكون كويسة معاها وأعمل زي ما بشوف أسلوب التعامل في صفحات الإرشاد الأسري واليوتيوب بس بتعمل تصرفات تخليني مصدومة وحزينة منها، مثال يوم كويس وتحفيز وتشجيع من أول اليوم وخروج وفسح وباباها سايق العربية على الطريق السريع وأتفاجئ بإنها ضربت باباها بالقلم رغم إن ده سلوك مش معهود منها، هي بترخم على إخواتها مش باباها خصوصاً إن باباها لما بيتعصب بيكون شديد معاها، ومش بتدي مبرر لتصرفاتها يعني لما أسألها بتعملي كدة ليه ردها بيكون "علشان مش كان قصدي، أو علشان مش هعمل كدة تاني"
 
علما بإني عرضتها على أطباء واختبار ذكائها حسب جامعة ستانفورد من أقل من سنة كان بنسبة ٨٧ ٪ وأوصى بتنمية مهارات وتعديل سلوك أعتقد. وموضوع عدم تركيزها لافت نظري من زمان وكان موضوع خلاف بيني وبين باباها اللي كان شايف إن مفيش مشكلة وإني اللي بكبر المواضيع وهعقدها لحد ما هو نفسه لمس المشكلة، ودلوقتي عايزني أعرضها بس لظروف وجودنا في السعودية مش عارفة أوديها لأن الاختبارات مكلفة جداً والتأمين مش مغطيها، ومستنية نزولنا في الإجازة لمصر.
 
أنا بحاول أتصالح مع إنها مش شاطرة دراسياً ولّا حتى متوسطة، بس مش قادرة أتعامل معاها سلوكياً، كل ما بحاول أشجعها بتحبطني جداً. أنا محتاجة أعرف أتعامل معاها إزاي وإزاي أعالج موقف زي مثال ضربها لباباها، يعني أنا مضربتهاش لأني لقيت الضرب بيسوّء سلوكها مش بيحله.
 
بس في نفس الوقت زعلانة منها ومش عارفة آخد موقف حازم معاها،
أنا كمان محتاجة توجيه للدكاترة الي ممكن يقيموها ويكون عندهم خبرة لحالتها في مصر.
3/6/2020